2007年8月13日

講飲講食2007 : (等位)

逍遙侯講飲講食2007 : 揀餐廳1 (等位)

有d開始熟又未熟到"好熟"既朋友, 往往話同我出去食野"麻撚煩", 我認, 我自己都覺得麻撚煩架, 不過至少到目前(2007)為止我願意堅持囉。
其實講來講去係得幾點o者。不過首先開宗明義我份人所謂"食野"其實食地方遠多於"食物", 或者話我既選擇取向偏向於考慮餐館既"環境參數"多過考慮佢既產品(食物)質素。可能有人話我咁樣係本末倒置, 但我既答覆係 : 其實大部份一般人都係一樣(並非真係以食物質素作判斷條件), 只係其中我敢講絕大部份人一係不自知, 一係唔承認。

快速歸納出黎有以下幾個大point:

- 唔等位。("訂位"係另一回事, 唔好混淆)
- 唔選擇"排排凳"。

其實諗左好耐, 對我黎講最主要既限制都就只係以上兩點。今次主要先談 "唔等位" :

唔客氣講, 我認為「沒有任何一間餐廳既食物, 係好到值得任何人去等位超過10分鐘既」。No exception. 所以d咩金滿庭(兵馬俑)、假和風餐廳、咩咩拉面...唔使旨意我去食。
間野多人食, 要等位, 唔係佢錯, 但係你真係on 99走去等位就係你問題。o拿我問你, 通常咩原因會令你走去等位入場食野呢?

- "有人話" 果間xxx "幾好食架"~
- 果間xxx "好抵食架"~
- 果頭冇選擇。

可惜以上三個令你去等位既理由, 大部份根本唔成立。

先講 "冇選擇"。我自己既對拆係: (1) 唔食住。錯開時間直到少人。 (2) 寧願食貴d既地方。 (3) 去第二度。這點通常又要同第1點配合。


「有人話果間野幾好食」迷思 : 呢個係最常遇到既事情, 永遠大家身邊總有d人會同你講, 去邊度邊度邊間野啦, 「我個同事話果度幾好食架」或類似情況。但係你地一行人好辛苦咁去到, 發現門前大排長龍, 呢種情況你咪話未試過。
好可惜又悲痛既事實就係, 10次裡面有3次, 結果係其實冇乜特別, 唔知有乜咁好食。有3次, 冇錯係ok, 幾好(都只係好少少), 但係其餘條件令人難受, 例如服務勁差、逼夾、間野唔舒服、四圍都係仆街客等等。而另外有3次, 直頭係「根本唔好食」! 只會有唔超過1次, 係的確好介紹。
而用我既講法係, 就算佢其實的確係比平時既好食少少, 「但係絕對唔值得為左呢個差別而去排隊等位」。為左食佢d "其實只相差少少" 既野食, 你地一行人付出左更大既成本, 包括等位之類。
唔該下次遇到呢種「人地話果度好食」既情況下, 你自己留個心眼, 食完返出黎印證下我講得應唔應。絕大部份「人地話好食」既地方, 根本就唔好食。諗住「食好d」作條件而願意事前付出成本(等位), 大部份情況下都係失敗既。


「有人話抵食」迷思 : 呢個理由通常排第二, 而又常見於果d乜Q火鍋打邊爐、"大大件壽司"。呢個迷思其實最易穿煲厄唔到人, "好唔好食"係唯心o者, 你有權夾硬話某某餐廳好食; 但係 "抵食" 有數計架喎。你地各位自己回憶下, 記憶中對上一次、兩次N次「人地話抵食」飯局, 埋單果時點?
基本上係90%以上, 埋單計一計數, 其實同平時去食相同野完全冇分別。有分別果次, 可能指既係 "幾個人去食, 每人平左10蚊"。可惜既係有好多時候結果發現貴過平時。

我唔知呢種「有人話抵食」迷思點解往往能夠在朋友同事間流傳到, 因為照計馬上就會被揭穿。但係又的確會被一直流傳落去。大家都好大方既, 當初因為誤以為果度"抵食", 因此可能千里迢迢、或者去到等位等成粒鐘、或者被"抵食"誤導, 因而忍受左間野d其他唔好既地方。但係結果埋單才發現呢個唯一優勢根本並唔存在

我永唔會因為「有人話抵食」而違反「唔等位」呢個前提。因為我好清楚任何、基本上是任何, "朋友既朋友試過話抵食"既店, 全都係一肚氣。10%食完真係平既店, 幾乎就一定勁難食。