2007年8月13日

講飲講食2007 : (排排凳)

逍遙侯講飲講食2007 : 揀餐廳2 (排排凳)

今次講 "排排凳" 既問題。

我超憎同人出去食飯, 揀到間似樣既餐廳, 一打開門入去就發現"能夠比我地坐既"都係排排凳。咩叫排排凳? 我畫左個圖仔比大家參考:

斜線係牆、淺藍色係張檯、橙色分別就係凳以及貼牆既Sofa (或者埋牆果邊都係普通凳。而我既"排排凳"定義仲係指 "兩張檯中間冇野隔開"。有極少數餐廳雖然座位編排係呢種格局, 但佢兩張檯之間會有partition隔住, 呢種我唔會列入"排排凳"類別。
討厭"排排凳"既條件之一主要係, 特別當你係兩個人, 帶住條女or打算溝既女呢種情況。一旦見到間野係咁編排座位, 我會好唔中意。情況許可下我一定掉頭走人。

我保證唔少讀者睇到呢度就會「哈~~」咁笑出黎, 心入面會講一句「真係頂你唔順」。覺得我多九餘、無聊、on9...之類。但係根據我既經驗...
絕大部份既朋友, 醒目少少果d, 一聽到我型容"排排凳"即刻用力點頭, 馬上明晒我想講乜野; 而大部份一般人, 係聽完我解譯後, 都會承認 : 其實佢地一樣咁憎呢種座位, 不過佢地全部每一次好泯咁食完一次之後, 就會完全拋諸腦後冇左件事。而下一次出去食飯, 就又會"唔覺意"再中一次招...。亦有一部份朋友, 其實每次入餐廳都會發現呢個問題, 但係怕被人笑/怕條女話佢/話多事/怕唔好意思 --- 而自己就範, 死死地氣跟住waiter行入去坐, 而唔肯/敢話唔中意呢d位, 行返出黎。

我肯定睇緊呢篇文既你都一定係以上是但一類人。因為堅持認為「都冇乜野o者」既人其實唔多。大部份人都係到臨場就"算啦" "是但啦"而就範。

好痛苦既事實係 : 在香港, 通常會係貴既、靚既餐廳先多呢種編排。反而cheap cheap茶記基本上唔會咁做。

請各位睇睇下圖 :

當你同條女入座後, 就會出現如圖的情況 --- 我仲先假設間野唔會衰到搭檯 --- 明唔明有乜問題? 問題好簡單 : 你會發現你冇辦法講任何野, 冇辦法安安樂樂同條女傾計。
當然, 起碼一半以上既 "香港人" 會無視呢種情況, 但我估呢一半以上香港人, 並唔會走黎睇我呢篇野囉。你會發現, 你只能夠坐低, 叫野食, 食食食, 講下無相干無謂野, 冇辦法放心地傾計的。如果你答我「挑, 理九得佢丫! 照講囉! 我地傾計關隔離撚事呀!」ok, 你勁, 我甘拜下風, 但我做唔出囉。