2007年8月20日

憑乜野要人地支持你地?


本篇係舊文, 仲要好舊, 睇返我係2001年寫既。當年仍然係好鬼fit可以去打Game通山跑既時代。
點解挖篇千年老文出黎貼?

(* 26/Aug/07 更新 : 刪除一段原說明為甚麼要貼這篇文的說話。因為竟然發覺很多人誤解我意思, 而且還是把意思完全巔倒了, 所以刪去, 不說明了。覺得怎樣, 就是怎樣。)
==============================

一單感概, 令我再三反思

故事發生係幾個月前。今時今日諗起先'令'出黎講。

故事係我同成班朋友去打wargame, 地點係西貢某地。該處唔算係流行game場(事實上我地不會去"流行"的場地), 算係行山徑的一部份, 但是事實上屬非常小遊人的地方。

玩開wargame的人大家心知肚明, 就係根本 *冇* 任何地方係真係可以名正言順打game既(三軍之類私人場當然唔算); 我咁講既意思係, 我地好清楚乜野係責任、自己做緊乜野....等等, 而唔係果種jar支氣槍周圍射、夜晚走入商場打CQB、係窗口射樓下隻狗果D含家剷(如果看官你正係咁既人, 唔好意思我係鬧你, 唔順超既約個時間出黎隻抽。)。

因為現場事實上係 *有機會* 會有人經過既, 所以作為搞手我地已經做得相信比大部份game友都要安全(我話既!), 係路上好遠開始已經掛上大大個又顯眼中英文對照既警告指示, 而且路上前後有三個穿著反光衫(地盤果種)既"風紀"睇實有冇外人"將會"進入現場(山路前後及場中)。

一切都相安無事(當然!)直至下午打完game, 全隊返回基地小休及討論戰況等......壞事就正正發生係全日呢個剛好冇人冇風紀在現場的十分鐘......

一個鬼婆行過我們的"基地", 手中拿著我們的幾個"警告牌", 向住我們一輪咀唔知up乜, 然後轉身就走。我們奇怪佢做乜囉住我地既牌走左去, 於是趕上去問佢做乜。原來佢話--我地做乜放呢D"垃圾"係度!! 根住就一輪咀講話我地 *成日* 放呢D垃圾係個山度呀、*個個禮拜*都見到呀, 等等等等難以盡錄。我地當然已經好有禮貌去解譯, 呢D唔係垃圾, 係用黎比路人注意既警告牌(我重申, 個牌中英對照既), 我地並唔係成日黎既, 幾個月都未必到一次, 而且我地一向收拾一切垃圾先會走....云云。

而想當然, 當然係冇結果。呢條臭西跟住就發爛乍走左去叫極唔應(唔好問我點解, 我都唔知佢做乜九), 注意既係佢囉走左我地好多警告牌, 之後仲要回頭大嗌話佢去報警云云, 呢D牌佢囉黎做証據云云。

或者我講得唔好, 但總之現場非常混亂, 而我地(我!!)就非常極度火滾! 非但被人當賊辦仲要眼巴巴比條臭西囉走我地既物資(你咪理呢D牌幾平幾貴, 總之呢D係我地既物件), 最緊要係我地係冇任何野可以做! 好多人(事後)同我講, 你地可以唔比佢走架嘛, 可以圍住佢架嘛, 可以追住佢架嘛....唔該唔好同我講呢D風涼話, 你講就容易, 事實上唔得就係唔得, 我夠知我"可以"唔比佢走啦多餘。講呢D說話, 就同你向一個女仔話, "個色魔想強你果時你可以唔就範架嘛"一樣低能。

之後我地係現場等左好耐, 因為我地真係打算等差佬黎(佢話佢報左警喎!)。差佬黎到我就要條臭西還我地一個公道! 結果當然係冇差佬到。而我之後係真係打算主動報警(電話都按左, 唔係講下果隻), 告佢搶走我地既野。至於點解"又"冇報到? 唔好問我, 我唔想提(這是另一個故事)。

呢件事我一直梗梗於懷, 心情差左好一段日子。但係其實令我"感概"既係兩個原因:

1. 最感概既當然係, 我地香港人自己唔爭氣先。其實我心底完全明白條鬼婆既感受(嬲還嬲); 因為我好清楚, 係香港既 "game友" 事實上就係一班咁既人。冇禮貌、冇公德心、隨便掉垃圾、破壞環境(仲要係惡意既)、去到game場當正自己大撚晒、唔 顧其他人("見到有人打game都唔撚識走, 抵撚死啦")....我當然唔係指全部, 而不幸的是, 仍然有*非常多*的所謂"game友"係咁。我本人唔知算不算得上是"game友", 卻希望各game友切勿使用基督徒戰法, 指稱"這些人不能夠算是game友"就當唔關自己事!呢D"game友"永遠只會不停抱怨, 政府不支持這種"運動"呀、傳媒抹黑呀、大眾不接受呀、冇地方打呀(所以"被逼"要係人地私人地方玩呀)、等等等等等等等等等, 就是鮮有望望鏡,自己反思一下, 到底"game友們"憑乜野叫政府、社會人仕支持,點解政府要批地黎比你班友搞破壞。

2. 第二樣, 我估大家都估到我講乜。就係回心一諗再諗三諗, 呢條鬼婆某程度上非常可敬, 雖然佢無理取鬧。如果呢個係香港人(中國人), 男人, 佢一定快快趣趣走夾唔抖, 而且多半望都唔敢望我地。更不要說要以一個女人之身去指罵一大班打緊game既男人(唔係一班細路, 而且叫得上係有"武器"係手。)。假如呢個人係香港人, 佢事後還只會比朋友說他"多管閒事" "有事自己囉黎" "你理得人地咁多丫" 或者有句到肉D既: "息事寧人"。