2007年8月22日

[PG] 男廁唔沖水之謎

香港地不思議之 : 男廁唔沖水之謎


《核突Topic, 女仕請迴避》


今日無意中係公司大廈男廁, 被我發現到「男廁唔沖水之謎」。呢個謎大概同「天花板波子聲」一樣, 早已被列入香港七不思議之一, 困擾唔少地道港人。眾所周知, 男廁經常出現 "屙屎唔沖水" 現像, 令人作嘔。非必話一定有, 但個頻率肯定係你見到唔會覺得出奇果隻。女廁我唔知會唔會有呢種常見現像。

首先要排除技術問題, 即係有時你會發現真係冇水, 又或者拉水制發現沖極唔去, 呢種case屬於可以解譯, 唔係人既問題。

本來呢種事大家可能見到, 講句「屌! 你老味丫」然後搵第二格就算。但認真諗, 係咪真係有咁多核突佬呢? 今時今日既香港, 又係咪真係仍然咁多邪惡男呢? 由於呢種現像常見於果d "半公開廁所", 例如寫字樓廁所、商場等等。照計會去果個廁所既 "廁客", 至少唔係甩皮甩骨果種爛人丫。會係度返工, 呢層樓個個撞口撞面, 點睇都唔似咁既人丫? 而今日我係公司男廁解答左呢個「謎」! 因此發現可能其實大家身邊好多呢種人!

原來係一個「快」字。我估有唔少人, 尤其某d好忙果種男人, 可能習慣左每次辦事既「操作時間」都係好短, 可能由除褲座落去果一刻起, 幾十秒做完全部流程抽褲走人。而因為始終唔係私家廁所, 因此係坐落去之前, 相信佢遵例走去抹抹廁板以及沖一次水; 而沖完第一次之後坐低辦事, 直到完成落貨程序, 水箱都仲未儲夠水再沖!

而正常人完成落貨程序時, 通常水箱已經充足了, 因此大部份人根本唔明, 點解幾咁靚仔既甲級寫字樓, 總有屙完屎唔沖水既cheap佬?? 而呢d "等唔切" 既麻甩, 由於其基本心態並非屙完唔沖, 而係 "精神上" 認為自己無辜, 只係 "個廁所沖唔到", 因此佢地打從心裡唔會覺得自己有問題, 甚至一樣會茶餘飯後同朋友講, 點解成日有人唔沖廁!

今日係我入廁所, 剛剛見到有人打開左廁格門, 見佢猛咁拉水制都冇反應。到我入廁格後聽到佢走左, 之後冇耐清潔阿姐入左黎, 但係佢鬧左句「仆街又唔沖水」之後就聽到佢一拉水制, 就沖得乾乾淨淨了......