2007年12月3日

土共、憤青/糞青、5毛黨、網特

土共、憤青/糞青、5毛黨、網特

選舉勝出之際, 想想好應趁呢個時候寫寫此文, 以便一般香港網友作好準備。 皆因香港一般論壇不嬲又往往劣幣驅逐良幣, 變成d學生仔、細路仔主宰話語權, 一旦陸化潮湧入網絡, 唔清楚對手係d咩人, 好唔著數。


[土共]
土共算係香港人比較熟悉既類別, 暫唔解譯。 以前港人慣於一見左仔就先冠之"土共"之名, 其實唔係咁正確。土共首先就係非外來者, 至少係已經算係"植根"香港既人。以前USENET時代既網上左仔, 估計大部份屬此類, 目前已式微。


[憤青、糞青]
憤青係香港比較少見, 皆因土壤不合, 難以培育。 但以曾特首之親左路線來看, 再過十年香港生產出原生憤青, 亦不足為奇。
必需懂分辨, "憤青"同我之後講既"糞青" (昵稱:"糞糞") 非常接近, 但有attribute上既分別, 盡量不要混為一談。 我在此預言, 香港必先出現"糞糞", 之後才有機會出現憤青。
區別: 憤青一般文字功力及水平較高少少, 而出於其性質, 往往對歷史也懂得較多, 唯是往往刻意採用自己既方式來解讀。 對付貨真價實既"憤青"其實幾辛苦既, 但往往能夠係戰鬥中有所得著。 對付憤青能夠令你被逼學習更多。
糞青則多是開頭以憤青面貌出現, 但幾句下來就能發現其實屬唔識扮識既傻仔一類。 文字功力冇乜、辯論水平冇乜、對事物既認識乃人云亦云 --- 呢度泛指"主流說法"。 糞糞的"文章"往往是單純的「口號式」貼文, 特色係假如你嘗試追問佢, 佢自己大叫果d"口號"進一步內容, 佢地會慌晒, 答唔出, 然後繼續乍傻扮懞重覆叫口號。 因為佢地打從心底以為呢d"口號"係絕對真理, 冇諗過會有人質疑, 當然自己都冇諗過其內容係咪正確。
舉一例說明之。 同樣大喊抵制日貨之傻仔們, 憤青能夠"創作"出濤濤雄文黎說明點解你要抵制(雖然通篇係錯誤), 而糞糞係唔識答, 只會反覆大叫「你係漢奸」「你係唔係中國人」之類。
最後係Objective既分別。 "憤青"們維護既普遍黎講多同 "民族" 有關; 而"糞青"們維護既既就多係 "主旋律" 觀點。


[5毛黨]
同樣係維護 "主旋律", 但5毛黨同糞青有本質上既唔同 (不過表面上好難分)。 5毛黨概念算係近一兩年先出現, 最早期, 最"原教旨"既5毛黨含意, 係狹義指, 正式收人工貼文既"網絡評論員", 有類似義務既成員, 亦有傳說中既「每帖收5毛」, 名稱由此而來。 不過確實證明"收5毛"講法既東西, 當然好難再係網上搵到。 因此後期大都認為存疑, 但呢樣根本唔重要。
5毛黨面目眾多, 由學者模式至糞糞型都有, 但基本核心目標無變, 就是維護"主旋律"即政府官方觀點, 副目標就係打壓人民既反對及質疑聲音。 以上係"目的", 而當中具體手段當然好多, 唔使我逐樣講。
必定要指出 : 由於 "出post收5毛" 呢一點既具體操作太神秘, 也太令人費解。 但同時現實情況又明顯人人都知有d野發生緊。 依家一般黎講, 相信真正"有錢收"既正式5毛黨數量唔多(亦唔可能多), 真正充斥網絡既係一d, 唔知由乜野黎驅使既 "隱性5毛黨" 。 當中唔排除有極少數係白痴腦殘, "自發"去支持主旋律聲音既傻人。
目前「5毛黨」一詞, 已泛指 "刻意維持主旋律觀點" 及 "刻意打壓群眾反對聲音" 既人, 而未必真係狹義話人一定有錢收。
另外, 同樣係維護主旋律觀點, 糞糞同5毛分別在於 : "糞糞"係被洗腦一群, 佢地多係打從心底相信佢所叫既白痴口號係正確; 而原教旨5毛係出於"辦事", "做野", 佢地本人並唔一定真係相信自己貼文既內容。 一切係一種爭執雙方 "大家心照" 既狀態下。
由於5毛特性, 因此好難由佢地既Attributes去分辨, 可以係一件扮理性討論既假斯文人, 也可能係一件裝熱血、扮血性漢子既假憤青。 而要由 "行為模式" 判斷。


[網特]
網特係最常被錯置既概念。
其實最初期, "網特"其實指既係「我地呢種人」 --- 直接d講係「反共既人」。 初期網特係專指反中共既人。 又出於中共既本質以及大陸仔普遍知識唔高, 因此好快變為指 "反中國" 既人, 呢個"反中國"用詞唔夠好, 簡單型容下, 就係例如某人取笑/嘲笑大陸人 (唔係政府) 既行為, 都屬呢類反中國範圍。
我地成日出果類「傑出華人系列」「強國勃起系列」等等就係。
但係唔知點解慢慢此字眼被混淆, 有時維持官方觀點既人都被稱為網特。 漸漸此字眼完全失去具體範圍, 雙方都會互指對方係"網特"。 而家"網特"已變成一個相對型容詞 --- 總之對於相反立場者, 均指佢係 "網特" 就得。
因此其實我覺得網特呢個字其實已經冇左意義, 我自己都基本唔會用。



(除以上外, 其實仲有一d香港專有類別, 呢類人既唔屬5毛, 又唔屬糞青或以上任何一類。 例如香港果d為左利益忽然愛國之徒, 早排上3萬點湧左一大批出黎。或者單憑「港糧中用」優越性而終日大呼「大陸幾咁好」之柒頭, 通常呢類又正係我成日講既「貨Van人」以及果種唔識野但又中意扮大陸通既果種人。 我留待將來再寫)