2007年12月3日

記憶年代鑑定法

記憶年代鑑定法

對於一d過去發生過既事件、記憶, 當你手頭好難搵具體資料、或者根本難以翻查既時候, 點做?

我自己最常用《參照物鑑定法》

每個人既人生中, 總有好多未必真係好重要, 但係你就發現佢印象深刻, 幾乎隨時可以馬上recall出黎既。可能係一隻歌、可能係一套戲、一套電影、一單新聞、某一個人、某一件事件, 等等。而通常以呢d為參照物, 往往可以快速咁大概判斷另一件事既大約年份。

以我本人為例, 一d個人常用參照物如下:

- [英雄本色], 1985年。中三。
- 六四事件, 1989年6月。剛出來工作不久。
- [超時空要塞], 中一。
- 上世紀末期對我們這種人, 有一組很明確的參照物 : KOF95, 96, 97, 98。98以後就基本難以參照了。


具體運用方式:

(案例1) [喋血雙雄] 係幾時既事?
由於記得呢套槍戰片血流成河, 當時仲有朋友話一路睇就諗起64(佢話殺得人多喎), 又確實真係竟然記得有影評又係咁講。可想而知上映肯定係64後, 而且唔會太耐, 因為說明好多人仍然心情處係64既震顫期裡面。因此判斷約在89年6月之後兩三個月內。

(案例2) 王靖雯幾時出道?
留意係 *王靖雯* 唔係王菲, 即刻記起第一首主打係 [無奈那天], 而點解我會聽到呢隻歌, 馬上記得係當時正在廣告公司返工, 間野日日長期開住收音機既 (幾鬼工廠feel)。因此馬上判斷就係果段時間, 而且必在64後至少幾個月。

(案例3) [暗戰] 係幾時既事?
睇[暗戰]時已經係同Bladegroup友一齊去睇, 記得仲係旺角豪華戲院既免費票, 更記得睇完返黎個個出post。而年份方面可知呢班友既聚集, 鐵定係在KOF98幾乎玩爛既時期先開始聚集, 而仍然能夠咁多人去睇戲, 又應該唔會遲好耐。因此判斷為98年至00年之間。

(以下綠色內容為 5/Dec補充)

其實每個人本身都會不自覺地運用此法去評估一件事(發生於何時), 只係我會將呢個方法放上檯面, 有意識地使用。至於點樣可以加強/進一步令自己能夠更有效運用此法, 方式如下:

- 首先隨意brainstorm, 隨意亂諗一通。多幾次, 你就會自己過濾得出一d總係經常重覆出現既item。呢d item就係我前述既如電影、電視劇、新聞事件、某個人、某次經歷等等。

- 最容易被忽略, 以及最易令人誤會既係 : 要注意呢d item 並唔一定代表係 *你中意既野* , 你只不過係對佢印象深刻。可能你會對曾經認識既某件臭八婆好深印象, 或者你會對某部爛片好深印象, 等等。

- 過濾出呢d item之後, 你就要抽時間認認真真地搵返佢地發生既時間, 並且強記一次。例如你冇錯發現自己對 [賭神] 印象深刻, 前前後後有好多回憶, 但係其實唔記得exact係咩年份, 咁你就需要主動查一次究竟 "你睇果時" 係咩時間。

- 呢度可以睇到, 係搵參照物既時候其實都有d條件。舉例講, 接上例, [賭神] 實際上係1990年既片, 但係對「你」黎講可能其實代表1992年 --- 你有可能實際上等到92年先至睇錄影帶 --- 因此對你黎講 [賭神] 並唔適合做參照物, 因為係你本人記憶中, 同[賭神]前後相關既事件其實係92年, 但係當你同你傾開[賭神]其他人會認為係90年。

- 假如一聽到"死記"令你好冇信心, 首先你就要親自試下。因為你會發現當你係將呢類對你本人好深印象既事件加上properties (例如年份), 你會好輕易咁記得住。而假如某個item你即使點記都無法記得到簡單如年份既資料, 咁就說明呢個item根本唔適合你做參照物, 建議搵第二d。

- 現實裡面, 真正運用果時, 往往都係會將 "需參照既事件" 同 "參照物" 經過幾層既互聯才能拉上關係; 好似我上面舉例果d案例, 其實只係我用黎做"案例"而已, 實際運用時往往會「拉上拉再拉」既關係。

例如 (以下呢段全老作, 用黎說明而已)
《果次係尖東竹林閣爆樽事件, 究竟係幾時?》
Solve:
> 回憶返, 果次係同肥妹Rainbow搞生日, 佢條仔玩包場, 中途有人玩野
> 肥妹Rainbow係阿Jay個friend所以先叫埋我
> 阿Jay係我小學同學, 見返佢係因為佢係蛋散強條女
> 識蛋散強同見返阿Jay, 係因為同Raymond Yip食Tea介紹
> 呢個Raymond Yip我點解識佢呢? 諗諗先...記得喇, 旺角威霸, arm arm出SFII 8人版果時我晚晚係度煲機, 成日同佢挑而認識
> 最後, 記得同佢地出黎既時間唔長, 到出12人版果時已經再冇同Raymond挑機

因此判斷《竹林閣爆樽事件》係在街霸8人版推出後 - 12人版推出之間既時候。

- 點解要用此法去鑑定? 因為此法乃用於平時, 行街傾緊計問起某件事係咩時間、食緊飯吹水諗起某樣野大家一時諗唔起咩時間... 呢類時候用。因為大部份時間其實你手頭根本冇得查資料, 就算有得查, 都可能"懶"唔想查。而且好多時候用此法去判定時間範圍, 仲快過你對住部機開google!