2008年8月12日

世界變了

世界變了

個個都聽過阿媽/阿爸把口講過「世界變喇」或者類似說話。突然、終於、不知不覺、唔覺意、而家輪到我成日講了。

幸運地, 出生在70年代, 而唔係50、60年代。由細個起, 差人/警察叔叔應該係可靠既, 係你可以放心同佢地講野既, 係可以信任既人(其實細細個都遇過d小事令我好細就發現其實唔得); 但係唔知幾時開始, 警察 --- 已經講緊「香港警察」, 不過唔係皇家 --- 變成你需要特別提防既人、唔可以放心咁對佢地講野既人、唔可以隨便相信既人。

電視上睇到既「明星」, 而家變成比你比我又或者你識既人仲要Earth, 仲要醜, 仲要無知, 各方面包括佢成為明星既部份, 都仲要比普通人差。

"大學生"應該係醒既, "讀過書既", 叻既 --- 就算唔叻都至少識得野既, 自覺或者唔自覺地有某種"光環"既 (* 以前呀, 我講緊70's呀, 對屋村仔黎講, 有呢回事); 但係唔知幾時開始, 其實係知不過唔記得咩年份, "大學生"代表住一班柒頭、on9仔、白撚痴、除左英文之外任何各方面包括佢自稱"讀緊"既果科都仲要比你呢個中五屋村仔仲要差, 而且差距仲好很大, 而且 --- 當中"極少數"你某日驚訝地發現可能你連英文都叻過佢。

究竟係單純既Sampling, 物以類聚、因為我只有資格識到呢d on撚9、白撚痴既仆街大學生, 叻果d我識唔到/人地唔會打算比我識, 定係人數比例真係咁?

曾經, 要買野, 要"幫趁", 能夠幫趁就去幫趁"大公司", 大公司代表住可靠, 細鋪頭可能厄九你。由幾時開始, 變左其實係大公司大機構先至用盡騙局厄九你昆九你, 同埋令你落左塔冇機會返轉頭, 你識破騙局之後反而係呢d騙子搵人告九你? 幾時開始, 變左擺撚明厄九人既撚樣站在"法律高地"一再聲大夾惡恐嚇受害者?

仲有, 以前"比人厄", 咪一鋪過比人厄左xx蚊, 冇回頭; 點解依家唔好彩比人厄, 你發現之後更令你驚訝既係你要眼巴巴繼續比佢喊打喊殺屈落去而你力爭之下發現你係要繼續定期交保護費?

仲有仲有, 你以前"交保護費", 係佢成日黎煩你, 又或者你驚佢會黎煩你, 因此你比錢, 令佢唔好煩你。點解、點解、點解依家會係你原本好地地相安無事, 因一次錯失或者意志薄弱, 或者索性講真說話 : 你比人厄左, 令你交左保護費後, 反而係因為你交左錢所以永遠地比佢煩?

仲有仲有仲有, 由幾時開始, 你會發現身邊總有d咁既 "朋友", 好痛苦好辛苦咁擺脫左一個騙子、一筆保護費後, 好高興地主動向第二班人奉上金錢, 然後用一個"好撚型" "好撚威"既姿態同你講? 而席間仲會用盡心思黎游說你、渡你升仙??


有關"信任"

有冇用心留意, 你細個果時(可能依家都係)究竟係因咩原因, 到底係乜野"終極因"令你對某d人產生信任?

家中水喉有事, 落樓嗌水喉佬, Sorry, "水喉師父" 得閒上黎睇睇, 忽然有感。究竟水喉佬有咩魅力, 能夠令到你下意識對佢信任? 或者改改角度, 係你唔會對佢有擔憂(* 註)?

(* 註 : 我明白, 假如你係女讀者, 你應該唔會咁樣, 呢樣我明白。但我亦相信你依然能夠睇得明我下面想講既野。以下我就唔咁煩刻意將年輕女讀者排除了。)

有冇發覺, 大部份情況下, 你會好放心有個電氣佬 (* 係「氣」唔能用「汽」, 我發現依家d細路真係唔明白兩個字既分別)或者水喉佬係你屋企砰零彭冷, 你依然神態自若繼續睇電視睇書打機 (當然就算你係麻甩肥佬都唔會"放心"到走去沖涼果隻)。

而細心一諗, 其實你對佢既信任只係建基係「你相信佢係個裝修師父」呢一點上。大部份情況下其實你由頭到尾直到比埋錢佢收工, 你都不曾睇過或者想起要睇下佢張證、個牌...whatever, 唔好扮野, 其實你連 "水電師父" 究竟理應渣住一份乜野野先至能夠"證明"身份你都唔知。至少其實我唔知。所謂"水電A牌"之類其實係乜, 係點, 係一張似車牌咁野、定係似醫生咁有好大張野要鑲係鋪頭而唔能隨身帶? 講真, 我唔知, 我亦相信你都根本唔知 (你明白個意思就得, 所以就算咁arm你識, 你知係點, 請唔需要串我「邊個話我唔識呀!! 你條撚樣就唔識!!」。因為事實上大部份人都係唔識既。) --- 更甚既係就算你問左佢囉, 佢遞左張野你睇, 你都唔識分堅定流。

唔好晒時間爭淆"牌照"問題, 明白我意思就得。我既意思就係事實上絕大部份情況下其實你之所以相信佢, 純粹係因為佢話佢係。而細心一諗驚奇既係大部份情況下你會深信不疑, 意指你根本唔會有一秒鐘懷疑佢會唔會根本唔係呢? 你冇。

點解呢? 又再回憶下丫, 唔係想串d"師父"或者嫌佢地乜, 而係一個客觀事實深值大家記憶, 就係其實好多時候呢d男人本身就咁行出黎, 你唔見得會對佢有好感。拿拿拿唔好以為我扮上等人, 學人睇唔起電氣師父, 我講既係 : 佢地通常"客觀外型"唔見得就咁企出黎就會令你產生"好感"。或者我咁講 : 你事實上唔會expect吳彥祖或者黃曉明係水喉師父 --- 你明白我意思了? 佢地並唔能籍由"外表"而令你產生"可靠"、"信任"等等概念, 甚至可能會有d令你反感添, 例如粗櫓或者大聲講粗口等等。但係當你知道佢係"師父"之後, 你會下意識地信任佢, 隨便佢入黎搞你個廁所廚房之類。


講完喇, 冇喇! 冇結論呀, 而且我知道應該本來就係一種基本心理學Use Case, 不過我唔知佢地會叫乜乜情結。寫出黎只不過想大家都去諗一諗。而我係會繼續用自己方法同語言去繼續推個神父結論出黎囉, 將來如果幸運既話希望有個結論篇。當然假如你正好知道通常呢種"信任"叫咩名稱, 亦可以email話我聽。