2009年2月24日

逍遙食評又再擊

逍遙食評又再擊


24/Feb

Daniel今日Last day, 我地話, 你條撚樣知唔知依家金融海嘯, 外面風雨飄搖呀, 你仲揀著呢d時勢黎轉工? 你舊年八月先擺酒(仲夾硬比你屈左五舊), 搞乜得你咁勇。

成班MSN、email傾lunch食乜傾左成兩個幾鐘。鬼咩! 件件柒頭都話今晚唔出得黎, 唯有食lunch算啦。一個話返外母度食飯、一個話睇戲、一個話趕住返深圳, 你冇睇錯, 係「返」深圳!

呢件蛋散佢成間屋一定鏡都冇塊, 成日以為自己貌比潘安舉世無雙, 集齊潘嫪鄧少閒, 其實四張幾野核撚突突仲地中海, 舊年比佢係水圍識到個知客, 兩個禮拜唔夠就 "過版" 學人玩租屋。我地圍內當然個個知咩事, 好心既就好好聲聲勸佢, 唔好心、冇咁好氣既就當面大大聲笑九佢。可惜件地中海情聖一臉神聖, 仲要死口講埋d「佢肯定唔係果d女人」「我好開心喎依家」。依家基本上大家唔會出聲, 不過個個心照係度幫佢倒數。丫! 有d人就係唔屌唔鬆化, 我地特登唔提唔出聲, 呢d人就會自己忍唔住大講特講。

其實佢成世對神州大地既認識只限於深圳同東莞; 佢最遠係舊年陪過阿知客 (當然啦, 識到佢呢個on居佬, 仲使撚做知客咩! 早就冇做啦) 去珠海浸溫泉。 珠海、珠海呀!! 返黎仲要食晏自己係度大大聲話「嘩! 幾遠呀! 我咁大個仔未試過坐車去咁遠」云云。之但係自從識左阿知客, 就似乎搖身一變, 變成大陸通、新中國代言人、中港關係促進協會主席, 日日食晏係度大講特講「嘩大陸幾~進步呀! xxxxxxx...」見到乜撚野都「我係深圳ar, xxxxx...」。通常大家一聽到佢又黎料, 就會自動自覺唔出聲由得佢係度做talk show, 我地安心食多啖飯。可憐既係每次一旦有其他dept d同事、尤其女同事一齊食飯, 就會見到阿中國通特別興奮, 口沫橫飛咁發表佢d「美麗新中國見聞錄」, 而通常d女同事就會睜大對眼坐定定聽佢發up瘋。入世未深、或者靚女既, 我地都仲會提點下:「咪聽佢吹水呀, 呢條友識條毛。」假如係d臭檔港女中女或者港中熟女就會費事開聲, 由佢地聽條柒頭係度吹吹吹, 畢竟無知係佢地自己責任, 我地冇義務指點迷津。

(哪哪哪咪撚對號入座呀! 我同你賭10蚊, 你地任何人, 公司裡面都一定有至少 2至N位呢種吹水王大陸通, 唔好同我講你公司冇!)


講咁撚多, 冇辦法啦劇情需要嘛! 君不見周圍d潮童、openrice云云, 篇篇 "食評" 都係成篇九唔撚答八, 寫一千幾百字私人生活摯友關係事業愛情財運音樂電影電視... 講下自己點打電話約人, 又講下間鋪幾q難搵, 最後先有十幾隻字寫野食, 而且普天之下要型容食物既型容詞原來只有一種, 就係「xxxx好好食!」, 勉強要數就係仲有「超正!」同埋「超掂囉!」, 再冇任何其他對食物既描述。

天底下森羅萬象無數美食, 對香港人黎講其實只得三種結論:
1. 「佢d_____真係好好食!」
2. 「佢d_____超正! / 超掂!」 , 又或者...
3. 「佢d_____真係 "好抵食" 囉!」


講到口水乾, MSN左兩粒幾鐘, 結果敲定lunch落 Coconut Forest Loft 。冇法啦! 我呢d文人雅士黎架嘛! 我地呢d「知名blogger」「網絡紅人」黎家嘛!!! 餐廳個名唔寫英文或者法文或者德文或者意大利文或者日文 (註 : "日文"乎, 其實即係d漢字呀! 例如「元祿」「築地」「板長」「板前」...呢d咪叫"日文"囉!!), 點顯得我高貴潮品味有型夠Trendy。假如我寫「椰林閣」你地咪冇晒幻想空間囉!!

我地呢度呢間Coconut Forest Loft branch真係氣派非凡。入親黎既都係有品味之人(如我), 衣香鬢影。普通人點識走黎fine dinner, sorry, 係fine lunch. See! What is life, this is what we call life and life style! 抵我地係門口排成4個字先逼到入黎坐排排凳, 好野梗係多人排架啦! 有腦架嘛! 成條街都係restaruant, 人地個個咁樣排晒係度, 一定係有料到啦! 果d冇乜人排果d, 一定唔好食囉!

坐定定睇Menu, 我點左個 Curry sea' food rice, 要全熟。中國通點左 Live-fry chicken' silk rice。阿Paul就要 Day style license-burn chicken' dig fix eat, 要Medium, 真係識食。主角Daniel諗左好耐, 最後咪又係叫返 Heat meat-sauce mean powder, 佢次次去邊間restaruant都係order this dish ga la! 懶係 big prop wild!

食完喇, 問下班仆街覺得d野食 dim sin, 如果唔係 how can i back to home write the blog ? how can i show up how 「Style」 i am?
(~^.^~)

以下係各仆街原文照錄...

阿Paul :「超掂!」

大陸通 :「個 chicken' rice 真係好好食!」

Daniel :「佢個meat-sauce甜左少少。不過都值得我地排4個字入黎囉。咁你個 Curry sea' food rice 呢?」Daniel寧轉頭問我。

我不由得低頭沉思半晌, 抬頭講,「呢一味 Curry sea' food rice, 係1976年, 大角咀一位無名伙頭, 費盡畢生心力所創制出黎。你地知唔知, 呢味 "咖哩海鮮飯" 既最高水平, 係點樣一回事?」

Daniel神情突變得嚴肅。
「要達到咖哩海鮮飯既最高境界, 我估係...要咖哩有咖哩味, 海鮮有海鮮味, 飯有飯味。」
我搖搖頭。

「我面前呢碟飯, 已經超脫左呢個境界。」
佢地有d激動。
「竟... 竟然能夠超越呢個界限, 究竟搞咩?」

「當年呢位無名伙頭, 耗盡心力所創既呢道菜色, 始終都受限於佢本人既修為所限。但係可惜, 江山代有人才出, 大浪淘沙, 幾許風雨。」我嘆息。

「呢度既師父, 一定已經突破左, 當年無名伙頭既極限。」果然係呢班人當中, Daniel既慧根係最高既。亦都難怪, 佢敢於係呢種時勢之下, 毅然轉工!

「現今呢碟 "咖-哩-海-鮮-飯", 已經突破左上一代 "咖哩有咖哩味" 既境界; 如今既佢, 咖哩之中, 隱隱咁透住"海"既氣息; 海既氣味當中, 又帶有濃濃既"鮮"味; 而係鮮味裡面, 我竟然嘗到... 飯既香氣出黎。」
眾仆街都係度屏息靜氣, 等待住我, 石破天驚既結論...
「...而飯裡面, 就同時夾雜住... 咖-哩-味!!!」
我眼中精光曝現, 如利刃、如晨曦。

「我‧輸‧左。」Daniel終於低頭, 幽幽咁講。

「你, 未免將一個人想得太簡單啦。」大陸通突然講。

「啊? 邊個?」

「我。」大陸通抬頭, 雙眼同我互啤。佢繼續講,
「只係咁樣既咖哩海鮮飯境界, 亦未必只得呢度。」

「唔通... 你曾經遇過?」我緊握住雙拳。

「二月十四, 情人節。深圳萬象城。我係果度食過咁樣既咖哩海鮮飯。埋單, 都只係三十八蚊人仔。」

係呢一殺那, 我再都控制唔到。等待左咁耐, 就係而家! 我係呢一殺那, 毅然出手!

我右手運拳為劍指, 虛掐住高科技百鍊不鏽鋼所鑄既磨砂銀面鋼叉, 遙指大陸通!

「我屌你老味, 仆街你咁都係要拉深圳黎講! 仲要係大陸食成三十幾蚊一碟飯, 仆街啦你~~~!!!!」

就係咁, 呢個飯局就比大陸通搞到不歡而散。四麻甩埋單 $180, 侍應有禮 --- 梗係啦! 呢度高尚餐廳黎架嘛!! 雖然每人圍起食成 45 蚊咁q貴, 不過亦只有呢個價位, 先至趁得起我地呢種, 咁有品味而又時尚既成熟男士。

本來想屈阿Paul請客, 可惜佢話爆左卡, 唯有AA啦。


由於 "網上食評" 係一定要有照片既, 據聞話係你申請上網戶口果時已經規定左, 寫食評唔影相, 會比差人拉架好似。

哪, 我用我部潮電話影既, 係咪影得特別靚? 影得特別吸引? 睇到你食慾大振, 好開胃? 冇辦法啦, 為左係blog度寫食評, 我先至勉為其難, 係咁二show下我d哥厘乍! 拿, 各位千奇唔好係咁寫信黎叫我教你地影相喎, 唔該!