2009年3月4日

逍遙劇場 : 創世風雲

逍遙劇場 : 《創世風雲》

這篇是在《相逢在世界終結時》之前, 原本的forum reply。作為forum reply, 隨便寫些東西就算, 並沒有寫心中真正想寫的故事, 於是就有後來的《相逢在世界終結時》。


《創世風雲》

無記8點強勢推出。

魔鬼: 馬得終
阿當: 歐陽肥華
娃娃: 酸圈

*** *** *** *** ***

原始時期母系社會, 屋企係女人話事; 魔鬼假扮推銷員上門:「太太你好呀, 我係代表伊甸豪延管理處, 通知返你架。我地撒旦公司已經囉左呢座伊甸豪延既水果代理權, 你係度簽個名就得喇。哪, 為左表達我地公司既誠意, 我地準備左呢個優惠試食裝比太太你試試先, 完全免費。」

打開個袋, 跌左個蛇果出黎。阿娃娃唔知係乜, 放埋一邊等老公返黎搵佢去試。佢自己就掛住試優惠裝入面d水晶閃粉防敏感無花果葉。阿當返黎, 佢就同阿當講:「今晚冇煮飯喎! 得個蛇果乍, 你食就食唔食就罷!」繼續試佢d閃粉樹葉。

阿當出去開成日工, 又驚被耶耶裁員, 人到中年, 係伊甸又冇第個女人, 唯有死死氣去食個蛇果。一咬之下「咦喂, 呢個蛇果真係好好食囉!」娃娃聽到, 雙眼放光叫佢咪食住, 佢要影左佢放上openrice。影完靚靚相之後就成個蛇果霸住食鬼晒, 由佢老公繼續餓。


*** *** *** *** ***

《創世風雲續集》好悲慘啊...嗚嗚嗚


東窗事發紙包唔住火, 耶耶發現佢地偷食, 出信炒左阿當並即時收回宿舍, 所有合約酬金PFund全部冇晒。無金飯碗, 兩公婆好慘咁出去搵食...

(耶耶好開心, 慳一筆仲順利收返伊甸豪庭幅地, 10倍高價賣出重新發展, 比人係原址起7星帆船酒店《巴別塔》, 廣招外勞, 結果爆獲成為全球最大爛尾樓。)

亞當試過去印度果邊interview, 印度屬多神系統, 招請空缺大量。但阿當的印度話唔合格, 只好「返去等消息先」。

(佢唔夠醒目, 知道當時新成立既撒旦公司係由耶耶舊伙記自己出黎搞既, 但見到連CEO撒旦自己都要出黎做埋Sales賣蛇果, 諗住冇前途, 冇去試。其實如果佢過左去, 就係第二把交椅, 又熟悉耶耶公司運作; 耶耶再做第三個人類, 都唔會夠佢地鬥, 歷史必然改寫。)

娃娃就試過去中土見工, 玉皇大帝同太上老君望住佢一頭金髮, 一副鬼婆激突身材同埋果小片無花果葉, 對娃娃講:「夏...夏小姐, 唔好意思, 我估我地請緊 "觀世音" 呢個post, 唔係好適合你。」

兩公婆頓成雙失。突然某晚亞當捉住娃娃就要做。娃娃鬧佢, 死佬冇工開仲掛住做? 亞當話, 唔係喇, 我有辦法, 黎啦...

亞當醒起, 只要有BB, 愈生得多, 就可以領取愈多綜緩, 好過返工。佢地悟出此道, 便是所謂... 【要生養眾多, 遍滿了地】。


《完》