2010年5月17日

[五區公投]失敗了

[五區公投]失敗了


用腳指公諗野, 都估到我今日必定會寫d野。不論公社兩黨自己點講, 對我黎講「五區公投」確實失敗左。亦不違言, 係失敗到事前完全冇想過既地步。

出奇地, 得到呢個結果我反而冇怪共產黨、冇怪特衰政府、冇怪土共; 我認為得到依家呢個結果, 並唔係共產黨、政府、土共們的「功勞」; 佢地固然做左好多那渣野, 但由佢地所作所為引致既影響, 放到依家呢個低到 17.1% 既投票率上, 估計係微不足道。要達到呢個低到「可恥」程度既投票率, 必定係真正來自香港人自己既真實意志。正如我前面所講, 香港人, 17.1%, 呢個確實就係你地表達既訊息。真係恭喜晒。


收集返黎, 代表著香港絕大部份人所持, 點解唔去投票(包括白票、廢票)既主要「理據」係:

我反對議會暴力, 好撚憎社民連/憎長毛/憎毓民
我唔認同五區公投囉
你地係度浪費公帑, 辭職又選返, 唔知你地做乜九
去投票咪俾政棍利用囉
政府自己都唔投啦
你地又公投又起義, 太激烈
好心你地唔好激嬲阿爺啦, 唔係阿爺睇住, 香港玩完喇
我好撚理性/保持中立, 唔會去投票囉
搞咁多野做乜者


本來/照計/原則上, 我會寫一二千字, 逐點駁斥以上所有呢d幼稚論點。不過我覺得我已經唔再需要寫, 因為寫黎真係多九餘。有得投票而冇去投票既絕大部份選民、香港人, 你地依家正沉醉係極度心涼既狀態, 正在極之自我感覺良好既狀態, 你地正在沾沾自喜、為自己既「先見之明」而正在感受「勝利既喜悅」(「挑! 一早話撚左晒九氣啦, 搞乜撚野公投丫」)。你地正傾巢而出, 感到吐氣揚眉, 以一副全知全能者姿態盡情嘲笑支持公投人士為傻仔。係呢個狀態下, 我寫一二千字黎駁斥當然都會係真正既多九餘。

當你地之中有好大部份, 仍然停留係「唔去投票係我既權利, 請尊重」(* 提示:呢句係非常典型既「無具體意義」廢話, 達教材級。因為除左唔投票之外, 其實吸毒、食屎、跳樓同自宮等等都一樣係你既權利黎, 我地同樣尊重) ; 既唔支持, 又唔懂得投白票或者廢票, 而竟然以為厘埋唔投就係「彰顯了自己權利」。呢種程度, 當然唔會明白究竟自己放棄左乜野、做成既影響究竟有幾深遠。當然更唔會明白, 支持者們究竟為左乜野而咁傷心。

我寫此文既目的相較之下變得好簡單, 非為駁斥(因為冇意義), 乃是「立此存照」, 必需寫於「五區公投」因你地既自作聰明同懶醒而失敗既2010年5月17日。

因為我知道你地呢班人(「香港人」)有幾善忘。你地終有一日, 會如當日支持領匯上市既人一樣咁後悔、痛苦。唔使擔心到時自己唔記得, 因為到時我會使用本文, 提醒各位看透世事既醒目仔, 你地今日覺得自己「好精明」而作出呢個令自己覺得好威威既選擇。


不過假如到左某一日, 連你地呢班今時今日仲覺得「懶懶閒、公投關我撚事」既世外高人, 都有如我地一樣地感受到不公義、感受到我地依家所感受既憤怒... 咁代表呢個香港, 已經到左一個幾咁無藥可救既境地呢。