2011年12月12日

唐犬買撻:幫唐犬說好話

唐犬買撻:幫唐犬說好話

參考新聞(2011.12.12): http://the-sun.on.cc/cnt/news/20111211/00408_003.html


聲明:呢次我居然幫唐犬,仲寫成幾百字。

拿,首先,唐犬既柒事本來已經夠多,多一件唔多少一件唔少。而其實我倒覺得"單單囉呢單野而言"其實唔係咁大件事。冇乜需要煲到咁大。呢d冇殺傷力既柒事煲得太大,只會令人忽視左其他更應該屌柒既事情 (if any)。

首先一件事係唐犬本身係有錢人呢點唔係秘密。而「有錢」唔係原罪。要做特首「要察民情」係就係應份,但確實任何人都唔可能知道一切價錢,講句坦白話,就算唐犬唔知蛋撻幾錢,都並非乜野好失禮既事。我倒真係唔覺得「有錢人未買過蛋撻」有幾失禮。掉返轉丫又,我即刻問你海港城租個鋪位幾錢,唔比你高高,要你即刻答,你答錯或者答唔出又或者答得唔夠「精準」(以今次大家對佢既要求黎類比)我係咪又可以笑鳩你?

而且現實d,就算貧苦如我地,都唔代表就好"知價",我都算死窮撚,但係不嬲日常生活都成日唔知價架啦,你問我衛生巾依家幾錢包我真係唔知。飲食既話唔食開果樣野就唔知架啦,你依家問我係旺角買包焗薯幾錢、買包「雞排」幾錢我都唔識答你,係咪代表我就高高在上睇唔起平民百姓?

而唐犬掉兩舊出黎係好"正常"同可以被預測的。首先大家可以想一想:佢唔知幾錢,而假如估細左,所受既責罵會有幾巨大?必然遠比依家恐佈。所以佢必定傾向估大係安全過估細。佢心目中既"cake"可能平極都要廿蚊果d,而佢評估一個中間數,可能十蚊十幾蚊,所以事實上佢係必定會掉兩舊出黎。而事實上只要蛋撻貴過8蚊,成件事已經冇問題。而對有錢人黎講,5蚊同8蚊呢個誤差,我唔覺得估錯左有乜咁值得驚訝。

佢柒既係,居然冇簡單地開口問一問老闆「幾錢呀?」,咁做既"親民"亦唔會出醜。我唔認為佢開口問幾錢會柒,比著我去買我都會問問(除非有牌寫埋出黎,咁就冇得拆)。

唐犬乞人憎就唔使講,本人立場有幾咁「鮮明」估計大家都知;之不過呢單野我真心覺得佢唔係做錯咩大事,假如太著眼係呢d冇乜殺傷力既無聊事上,只會幫左佢。