2011年12月11日

午夜紅Van之戀

午夜紅Van之戀

午夜港島返九龍紅van,一對wing wing地男女(可能已經好wing)上車,由上車開始手機播卡拉ok然後兩人全程+全情投入深情對唱 (我年紀大,d後生仔歌基本唔多識,只能講d歌聽過下但唔知乜名又唔知應該邊個唱果種),演唱完幾首之後兩個開始攬埋一舊深情對話。

個人估計佢地應該係bar出黎,仲維持緊港式劈場音量,各種果d「你知唔知我有幾中意你呀」「你上次咁樣,我個心幾痛你知唔知」之類"理應"係酒吧/卡拉ok行出房厘埋廁所門口轉角或者行出大堂捐入商場樓梯打電話先講果d對白不斷以劈場音量伴隨住司機大佬播既許冠傑70-80's歌曲陪伴大家過紅隧。但係全車冇人講乜野,大家都好似扮聽唔到咁靜靜做自己野,睇手機既睇手機,眼望前方既默默眼望前方,雖然大家都明白大家都聽得清清楚楚。

我唔係想指責佢地,亦唔係準備恥笑,更冇打算發表神父偉論。嚴格地講我甚至唔係好知自己寫出黎既"用意"係乜,我甚至唔係好識得型容處身呢個場景既心情。呢個嫵汶只係單純想記低呢件事。

諗諗下,其實果個心情應該類似有種「偷窺感」,就好似自己唔覺意聽到公司兩個同事原來有野咁…果種心情 (雖然明明係當事人自己大大聲講出黎)。其實我自己都係「扮聽唔到咁靜靜做自己野」既一份子。因為果d對話係唔會expect好公開咁聽到人大大聲講出黎既東西,情緒上其實根本唔識得比反應。

仲有,當「深情對話」講到某d肉緊處,絕無花假,真係有發生「司機減速行駛」……。