2012年4月24日

港女口味:談黃德斌

港女口味:黃德斌

突然想囉黃德斌出黎講。大家亦都唔使又藐藐咀「挑你神父又係度嫌三嫌四唔抵得人地多女仔中意」;我搵佢出黎講,確實係因為我見到都幾多女仔中意佢。咁又點?關我咩事?點解我又唔囉吳彥祖古天樂出黎講呢?

是咁的。其實神父我一直識得一個朋友,又唔算真係話好熟好friend好深交,但係都叫識左都十幾年果隻啦。姑且稱其為H先生。

呢位H先生,個樣基本上係同黃德斌相似度達90%以上,而且武功高強。我講既「武功高強」就係字面上既「武功高強」,唔係咩比喻。面型,H比黃瘦;身型,黃生屬於果種比較漲既玩GYM式健美先生型,而H則係消防式鋼筋型,兩人身高差唔多,年紀都差唔多。個性嘛,應該係較大分別既地方,H雖然身強力壯武功高強,但卻居然算係有d「內向」既;好難想像佢會如黃生一樣去做演員。其他「非外在」既元素,由於我現實中並唔認識黃生,因此無法比較。不過估計黃生教育程度比H高。

但問題係,我識得呢位H十幾年了。因此佢既一d「往績」我地圍內都好了解。

論外型,兩人係相當接近的,可以講係同type。年紀都差唔多,照計對於女人黎講,兩人既吸引力「理應」也差唔多。但係事實上,多年以黎H對女仔黎講,都係屬於唔受歡迎既。甚至過份d既情況,有一大班人相識果種場合(如Karaoke),我聽到果d新相識既女仔幾個私下講,「Eee~正核突佬~~」yes,佢地講緊H。

呢個case比較mean,但係確實好能反映大多數既情況。呢個情況我地圍內早已習慣並視為「正常」,H本人都唔見得會太在乎。曾經有另一老友多次介紹女仔比佢識,其中一位女士事後既另一經典回覆:「我接受唔到帶住個三行佬去見我班friend囉。」。

呢個就係我一直想講又唔知點講既,其實差唔多既兩個人,之但係一個係nobody,一個係電視演員;於是,對女仔黎講,一個叫「(藐咀)死核突佬、三行佬」,另一個就係「大隻型男好性感,見到就濕晒」。