2013年3月1日

土國長途大巴

【土國長途大巴】

呢張影得唔好,土國既長途大巴。



熟我都知,我係非常中意坐大巴旅行既,要我揀火車同大巴我打死都飛去坐大巴。不過咁多年來,都冇坐過任何夕發朝至既過夜大巴喎 (當然講緊大陸),其中主要原因反而唔係安全問題,而係大陸過夜大巴基本只有臥鋪 (實有人包淆頸話有座席,鬼唔撚知咩!班次少及難買呀大哥!),而大陸既臥鋪大巴係我死穴,諗起陣大陸厘臭腳味 (仲要成車人都係) (仲要蓋佢地果d千年唔洗既屎忽味氈成晚) 我就投降。終於要係土國被逼試喇。

嗱,我先舉d牌面先。土國長途大巴呢,就牌面睇,照計應該係完全無敵既:
- 唔貴
- 乾淨 (我留意到,每程都routine洗車)
- 靚椅,唔係甩皮甩骨果d
- 居!然!有!個!人!娛!樂!站!(可惜電影只得土文配音仲無字幕)
- 居!然!如飛機一樣有專人服侍有drink選擇…
- 仲!居!然!有小食,小食仲有得比你揀!!
- 長途休息站搞得有聲有息,比大陸好三四倍(呢個應份…)

以上咁多一流優點,本來,應該係完全無敵,right?之但係……有一個缺點,就只有一個缺點。而呢個缺點,足夠將以上優點全部打消,由The Best變成我坐大巴多年,最難受最可怕既體驗。


佢冬天放暖氣。


Well,你地土國凍,「冬天放暖氣」照計係優點黎。但係!但係!你架車係密封既,而你放暖氣係用獨立腳底噴氣既器材,而車本身個冷氣/空調係熄晒。大佬,well,可能你地慣左,但我呢個香港人,就熱撚到頭痛(我本身仲係個人特別「熱」果種)。

我係大陸坐過綠皮車硬座,well,佢係好熱,但在大陸,大家唔介意除晒上身冇尷尬,都叫頂得到。但呢度穆斯林國家,我已經除到最底果件底衫喇,仲係成面大汗,而我望望隻錶,他媽的仲要焗多五粒鐘……