2013年5月6日

海運大廈印象

海運大廈印象

我腦海中既海運大廈…

有d鋪,我永遠都記得。有d鋪,甚至好似依家仲係度。

行果條大樓梯上去,一入門口,左邊角落就係一堆幾間「奇怪既古董店」,唔係淨係古董,都包括一d世界各地既得意野。細個果時行過就一定會去睇佢果d燒成奇型怪狀既可樂瓶…

之後係一堆珠寶店、「貴錶」店,但唔係依家果幾間。之後到第一個大廳,即而家成日搞車展果度,左邊有酒鋪,以前成日賣「酒辨」,即使我地呢種窮等人家,都有能力買幾隻返去放櫃度當擺設。

之後有「哥哥公司」,玩具店。當年黎講算高級野,鬼仔玩具。我地有得睇冇得買。當年d售貨姐姐係冇面比既,態度「真實」到依家你地d後生仔想像唔到,擺明黑住塊面大聲叫你地d爛鬼細路咪亂搞d貨呀,你地呢d細路買唔起架喇咁。反正佢d鬼佬顧客聽唔明。

斜對面係See's Candy時思糖果,依家應該仲係度,但好似已經轉左鋪位。總之以前係在地面果層既。當年我仲係會話,大個左賺到錢就會入去買比阿媽食。

再入d就好難記喇。再入面已經無法記得邊個鋪位係d乜,只記得有幾間專賣大肚衫、有好多賣BB野、仲有幾間阿差賣地氈既。我細個經過都好驚,總覺得賣地氈果d鋪頭都好陰森恐佈。