2014年1月18日

耐人尋昧既「GEM大陸爆紅」

耐人尋昧既「GEM大陸爆紅」

認真。唔明點解GEM會無啦啦係大陸爆紅。

可能同大家「想當然」唔同,係鑑賞能力方面,我係認為大陸觀眾,應該會比香港觀眾更高。 (注意:係呢度我唔囉真正高水準既台灣黎討論,只談香港同大陸)

呢種類型既歌唱節目,(自從台灣開始之後)大陸好早就跟隨出現,比香港早好多。雖然往往選曲同後台音樂部份水準參差 (選曲有文化差異、後台Band就直頭係差),但選手水平從來唔弱。從來都唔弱。香港人嗤之以鼻,好大程度只係因為人地既選曲問題。

用我比較熟悉既部份黎講丫,想一想,即使係如多年前《超級女聲》咁樣既節目,人地都可以「淘」出如張靚穎呢種級數出黎。

香港剛有《超x巨聲》時,我係幾乎每一集錄影都有飛,入現場睇既,而當時偶而都會有大陸既參賽者。作為現場觀眾(現場同電視睇已經好大分別),我可以講一個事實,就係雖然往往選曲出晒事,但講實力,大陸果班真係堅,雖然未必話贏晒/秒殺香港。

我前面講咁多,其實只係想指出一點:「大陸觀眾/樂迷,早就係長期受呢類節目洗禮既」,佢地(觀眾/樂迷)本身,可能品味格調仍然低,但絕對唔係「未見過好野」既人 ——— 呢點係我最想指出既。

但好似GEM呢d平時唱歌鬼食泥,唱既亦只係pop到唔pop BING BING BANG BANG 再唔係就鳩叫既「女歌手」 ——— 我唔想太刻薄,但都要指出一個事實 ——— 就係 即使係香港,基本上都只有死o靚仔、小朋友中學雞中意佢唱歌 (貪佢波大果d死毒撚隔開先,因為依家講緊唱歌),唯一顯而易見,佢比到大陸觀眾/樂迷衝擊既,係佢相比而言確實有著果份時尚、新潮既都會氣質。而呢一點偏偏係任何,我強調任何,任何一個即使靚到上天既大陸女仔都唔會有既東西。

就囉佢爆紅果次《你把我灌醉》,他媽的我聽完,搞錯呀?根本就平平無奇,完全冇任何出采之處,編曲改變左,但係又冇玩盡,老實講,呢個演出,即使放《超x巨聲》都會fail。我真心唔明點解大陸人反而當係「神演出」。唔好話咩「感動」,直頭係「感覺」都冇。再重申一次:大陸觀眾/樂迷並唔係「未見過好野」既,所以GEM咁既行貨演出居然「爆紅」,令我覺得不可思議。

假如GEM係走上去唱返佢d Where did you go 之類而爆,我反而唔覺得出奇 (因為咁樣對大陸觀眾有衝擊反倒合理),偏偏又唔係。