2014年2月15日

李慧玲被炒

李慧玲被炒


事隔兩日,「熱潮」退去,我先敢出黎講幾句…

其實呢,就廣義而言,「李被炒」呢件事就當然唔係一件好事(廢話中既廢話),但係對於依家李慧玲突然變成「名咀」、突然變成大家口中既英雄、鬥士,其實我當初係好詫異既……

點解好似冇人記得,短短幾年前,李慧玲根本就係標準「和理非非」?「理性持平」「各打五十」係最佳寫照,基本上發生咩事,你唔使聽,總之佢既結論一定係「你唔啱,但係你都有錯」mode。
(利申:我本人係根本唔聽電台既,但往往會有朋友、網民討論,令我知道呢d節目講乜。非常偶然聽節目,都係事後人地有link我就聽下,或者youtube。)

ok,我明白即使係咁,咁佢都確實唔算「反派」,非常勉強都算可以列入「正派」,只係比較弱 (直接d講,佢算老幾?)。但係,早幾年邊有人會傻到視佢為「名咀」架?係咪中間呢幾年,其實佢真係改變左好多,只係我唔知?

所以,其實呢單野發生,首先我就好悲哀在「廖化作先鋒」,就係一個一個被封咪、被退休,香港原來已經到左 連大口玲都已經係「一線名咀」。原來佢已經叫做依家「敢言」果個。 呢件事本身比我既衝擊仲大過佢被炒。

對於事件本身,本來寫左好多,都係刪晒佢。只留低一d比較「冇傷害性」既:

- 其實我個人確實相信唔關CY事。意指至少並非CY開口郁佢 (ok,講坦白話啦,我真心覺得佢未夠班搞到CY會落柯打。真心)。我比較傾向無論政府定CY,根本冇人點過佢名,而只係某機構扮醒目,急住交心跳忠字舞。

- 我會認為大口玲第一次記招時,講得非常愚蠢。無論佢係咪真心相信(定只係戰略)、有冇證據,佢都唔應該直接開牌講「梁振英」三隻字。頂多講「政府」要佢走。