2014年3月14日

女人街「鬼打牆」

女人街「鬼打牆」

忽然記得單野,趁仲記得就寫一次。今日講鬼故,而且呢單野係我自己親身經歷既,大約兩至三年前左右啦。

講起黎慚愧,呢種事件,我一時淨係記得大陸人叫「鬼打牆」,但我就完全記唔起廣東人不嬲叫呢種情況做「鬼xx」…而事件發生係我地香港人熟悉既「女人街」。 係!我居然係「女人街」咁旺咁熱鬧既地方遇上鬼打牆!!!



先睇圖。大家應該好很熟悉「女人街」喇,就算你係大陸人只要黎過香港,都應該行過女人街 (離題:我發現大陸遊客好多都混淆左女人街同隔離既行人專用區、或者誤以為兩條街係混合統稱「女人街」——就此打住)。女人街籠統黎講,分為四段(如圖),例如你由(A)點出發,要行到去(B)點,共要行四段路、行到出B點登打士街(見到廣華醫院/家樂商場)就係第四個路口。

圖中大家會見到,第三段路我劃左紅線。咩意思?就係話說我當時,來回行左幾次,呢一段路完全消失唔見左!

故事係,其實係呢個「第三段路」裡面,有間餐廳,我同某幾個朋友係好中意去既,成日同親佢地出黎食飯,都幾乎Default就係去果間野 (所以跟本係好熟,唔可能存在「記錯/行錯路認錯位」呢類情況)。有一晚,兩三年前啦唔記得準確日子,呢班朋友又約食飯,唔係d咩半夜三更,而係 最熱鬧最旺盛既晚上八點。當時我差唔多大約8:00就已經去到先達,行過對面已經係(A)點。

咁我好平常咁由(A)點出發,行呢段大家都好熟悉既女人街啦。提一提,呢種情況我唔會行女人街中間(太多人),我習慣行有大廈街鋪既兩邊。一路行,我相信大家都一樣,每過一個路口,根本已經好熟悉果個路口會有d乜野鋪頭、以及每一part路大致上有d咩鋪頭都早就心中有數。但當我一路行,發覺唔妥。咦,我已經行到登打士街見到家樂(即係已經到左B點),點解並冇經過間餐廳既?我第一次諗住可能自己大懵行過龍(好平常),就掉轉頭行返第三段。由於對間鋪個位心中有數,就一路行一路留意住餐廳「理應出現」既果一面。然後發現,又係一路行到A,冇出現過!

開始覺得唔妥,因為朋友們已經到晒等我,所以唔可能話間野執左。我會唔會on9到記錯間鋪個「邊」呢?於是係A點,我走過去另一邊,再重新向B方向行。屌那媽,一路行一路數街口,發覺行到去家樂,(計埋登打士街)竟然係得3個路口!中間有一段完全消失左!我唔信邪 (事實上比著你都唔信,因為係人來人往既夜晚8點幾),又走返過去原本果一邊,再回頭行,又係數左3個街口就返到去A點。

朋友已經打黎問我做咩仲未到(大約8:10),我話唔好意思,再等多我一陣,叫住野食先。最後我唔敢再係入面行,選擇兜路,繞到出去彌敦道外面行,又一路行到登打士街口,轉入去,專登行到花園街由花園街數,數到去明明確確地見到「豉油街」果個牌先左轉入去 —— 終於搵得返「消失的第三段」。

搵得返間餐廳,入到去坐低,滿身大汗成面好似洗完面咁,又無謂好地地同佢地講咁多,只好答:「哦,係呀,行到好熱囉。」