2015年4月18日

捐書

捐書

「捐書」對我黎講,係一個老話題,而且從來冇解決過。

依家本來已經少買實體書(相對而言),而且同細個果時既心態唔同,依家睇完既書,會希望keep返係度既大概只有30%。雖然我都唔係狂買書果類人,但耐唔耐積出黎既書都唔少。

就咁掉又唔多捨得,送比人?我好快發覺,原來自己身邊認識「會睇書」既人比率極低,都仲未提閱讀口味係咪相近呢d問題。成撚日有d人會話賣左佢咪得…如果你話逐本賣,晒心機時間勞心勞力我真係冇你咁on9,你話二手書店段斤稱,我試過,一樣晒心機時間體力「搬」到去鋪頭當收垃圾咁仲要睇佢面色!

最最重要係:我真心唔想用「賣」既方式黎解決、那怕係乜春慈善團體最中意搞果d乜鬼舊書義賣之類,限時限刻,而且同救世軍收書之類一樣係囉去賣。而我係希望本書可以「比到下一個人睇」(我發覺原來係冇幾多人明呢兩樣野有乜分別!)。有人(not me)試過直接捐比市政局圖書館,結果發現係根本唔可行既(人地仲當你麻煩傻佬)。

究竟香港有乜野真正可操作既方式黎送比真係會睇書既人、或者有需要既地方?咁多年黎我只真正試過一次,覺得係真係「滿足心願」既,就係舊年旺角佔領區果個「佔領圖書館」,其實我放左好多書落去架。呢次係唯一一次(其實我分好多次黎放,但姑且當佢一次)我覺得係接近我原意既捐贈,只有呢次。

有冇人試過其他做法?
(其中一個我目前心目中諗緊既係,香港d醫院,唔知會唔會有類似「圖書館」既地方(可能係非正式),放左d書黎比d住院病人囉去睇既。另外就係老人院,但係其實我相當懷疑老人院果d老人,仲會唔會睇書。而且我睇既書,相信亦唔適合d老野睇…)