2015年4月24日

千里傳音耳筒

千里傳音耳筒

✿✿✿ 非靈異故事 ✿✿✿

是咁的

以下呢件怪事,本來我當作《耐人尋昧》式故事,差唔多忘記左。但今日同同事吹水,原來佢都發生過幾乎一樣既事件,因此可能其實係幾「普遍」既現像,儘管寫出黎睇下有冇高人知道究竟係乜野一回事。

其實我發生呢個情況已經係兩三年前既事,記憶中近一兩年冇再發生。故事係,好多時深夜我仲會係度打緊機,因為太夜,好多時候會戴耳筒。相信絕大部份男網友都會熟悉呢種scene。
故事就在「耳筒」上。話說我唔係果d『耳筒達人』,我係幾乎冇要求果種,不嬲都係用d幾十蚊貨仔,最平凡既耳塞型耳筒,好粗用,用幾個月爛、壞、污糟就掉左佢再求其換過新既,IT雜架攤果d藥丸袋黑色廿蚊貨亦不拘。就算有時屎忽痕痕地想「買副靚d」,講緊既亦只係百零蚊貨色。簡單黎講,就係用極都係最最最平凡唔會有乜野奇怪功能既耳筒。(如圖,最普通既便宜貨)


咁係幾年前既某一個深夜打機既夜晚,係中間某d冇聲既空檔,我發現聽到d怪聲。仔細聽下,係好微細好微細、但係靜心聽就聽得出既,有個女人係度講野!!我即刻除左耳筒黎聽(我以為係外面既雜聲)但發現乜都冇;但係一戴返就又隱隱聽到… 只係慬慬聽到「講緊野」,而聽唔清講緊乜…我開頭以為會唔會收到d電台聲,但係總係覺得「個女人把聲好有印象」!

——— 本來可以繼續寫到好似鬼古咁,但係唔玩野喇,以下直奔主題:好快我就明白點解覺得有印象,因為呢個女人我知道佢係邊個!其實就係隔我兩三間(注意,隔左兩三間)果家人個師奶,呢個師奶平時教仔/鬧仔鬧得好大聲,熱天中意開門,就成日都會聽到佢又係度教仔,所以會一聽就覺得有d「耳熟能詳」。但係當時夜深,佢地本身都關左門,我放低耳筒既話亦聽唔到。
由耳筒傳來教仔聲時有時冇,終於有一次正好我自己有開住門打機,我一聽到耳筒黎料,就即刻靜靜地開門走出去,行埋去佢地門口。行到埋去就聽到入面的確傳來熟悉既教仔聲…即係話,我耳筒聽到既應該係live黎。
我係唔同時候,個耳筒分別試過
(A) 電腦sound card > 迷李hifi > 耳筒
(B) 電腦sound card > 耳筒   (部hifi仔壞左)
而前前後後出現「教仔之音」既呢段期間 (估計持續左年半左右),我先後應該換左兩三副耳筒,分別都有出現過呢個現像。

究竟點解會有呢種情況?空氣傳導?電線傳導?牆身傳導?超空間?蟲洞?M理論高維空間?重力鏡面效果?米諾夫斯基粒子?……通常我一同人講,大家會以為我講緊鬼古,但係我清楚知道肯定唔關靈異事,因為唔會有「鬼古」個內容係一個八婆師奶鬧仔。直到今日我先遇到第二個有相同經歷既人(我同事)…