2017年6月1日

松板屋

松板屋

提到以前尖東果間 東急 ,有網友唔知香港以前有東急百貨;其實有d唔可能,因為雖然久遠,但一來「東急」名聲一直都好響下,二來即使年紀輕,但東急一直維持到好後期先關門,而且就在尖沙咀,照計點都會知道有間東急…

(按:果個位嚴格黎講算唔算「尖東」見人見智,但係呢個係大家而家既觀念(地區概念會隨時日變化,例如我好細個果時,大家係冇「太子區」呢個觀念,目前大家叫太子既地區,以前一直已經叫「旺角」),返返去果個年代既人去睇,將果個位視作「尖東」絕對無可厚非)
(按2:呢廿年來人人識講「老尖」,但其實呢個字眼最初出現,係用黎同比較新鮮(當年觀念)既「尖東」作出區別;簡單講,漆咸道以西一路到海港城海皮/碼頭呢一邊先係「老尖」,大家自細熟悉既果個「舊尖沙咀」是也;漆咸道以東果塊「新地」叫尖東。)

一講起,我就又想講下日本百貨。而全盛期咁多日本百貨,我個人回憶中最念念不忘既,可能會出乎大部份人意外;就係我最懷念既果間,係《松板屋》
其實我係好難解釋架喇,因為果時我真係仲好細。夾硬要講呢,就係,以我當年一個細路既眼睛同認知黎講, 《松板屋》係幾間入面最令我感覺「異國風情」、最令小孩子既我覺得有「日本味」既一間。 ok我細個當然未去過日本,但係總之,我係會覺得以前銅鑼灣幾間日貨裡面,踏入《松板屋》係會真係令我幻想自己真係去左日本既一間。
(夾硬要搵一間排第二既,就係東急。)
至於呢個印象係出於乜野,我真係答你唔到。我多年以來亦search過無數次,但係就連一張CWB松板屋既內部照片都未曾搵到過。純粹只淨低我腦海裡面既一d回憶既景觀。ok有一樣野可能係導致呢個想法既原因之一,就係印象中,CWB其他幾間日貨,都人頭湧湧非常爆;但係其中《松板屋》會係相對冇咁多人、對比之下令人馬上感到非常舒適。令我覺得松板屋係幾間入面係與眾不同。係佢入面即使小朋友如我,都會感受到係果度係可以輕鬆舒適地用心慢慢逛。呢個印象完全係燒左落我腦裡面,所以我多年以來都無法忘懷《松板屋》呢間野。

因此《松板屋》一直對我個人而言有獨特意義同價值。我無法忘懷既程度係點樣呢,甚至於我舊年去東京, 我係特別、一定要專程返去「日本本土既松板屋」行下 ,係,直頭係果種我會獨立寫落自己行程備忘錄既項目之一黎。呢個直頭已經算係一個小小心願黎!
非常可惜既係,松板屋本身係日本都已經走下坡;東京首都裡面,只淨低上野一間分店,冇得揀。而我仲係神心到晨早食完早餐就過去,去到佢都仲未開門,幾神心。